ثار الأب عندما شاهد أبنه يدخل من باب الشقة وملابسه ممزقة وعينه متورمة وحمراء كالدم وأنتفض : مين اللى عمل فيك كده

- الواد مارد شديد اللى ساكن فى أول الشارع

- تعالى وريهولى .. أنا ح أطلع عين أبوه .. -

بس يا بابا

- مقاطعا .. أنت لسه ح تبسبسلى يالا ...

وجر الأب أبنه مندفعا نحو شقة مارد شديد وقد انتفخت أوداجه غضباً .. دق جرس الباب وكأنه يدق ناقوس حرب .. يفتح مارد

- أيوه

- أنت لسه ح تقولى أيوه .. أنده أبوك ياد

- بابا .. بابا

يخرج رجل يلبس بدلة عسكرية نصفها الأيمن شرطة والأيسر جيش ، وقبل أن ينطق بادره الأب وهو يلطم أبنه بقلم يذكرنا بعنفوان عماد حمدى مع عبد الحليم وكأنه جمع كل الخطايا وهو يصرخ ..

- مش قولت لك ميت مره متحطش عينك فى صباع حد يا أبن الكلب .. باردون يا باشا ح اسحلك أمه .. نهارك سعيد

ثم انصرف الرجل مع ابنه وهو يتحسس قفاه

ابن الثوره

انا ابن الثوره
مولود من ضهر الأبطال
قُولتوا شهيد
لكنى وليد
من رحم فجر جديد
نوره بيزرع اجيال
انا ابن النُبل والشرف
ابن الحق
من زمن تِقلت عليه الأحمال
عشان كده
امتلكت عزيمة الصبر
وكان قَدر ومكتوب
قَدر أزلزل بأيدى الزلزال
ومكتوب يكون اخويا
بعيون ما بتشوف
وقلب من صخر الجبال
لا كنت بأصد غازى
ولا حاربت احتلال
كنت بدافع عن لقمة عيش
عن عمر مش قادر يعيش
عن كرامه
عن نزاهه
عن الرقى والجمال
كان سلاحى ورده
على سن مبدأ
وسلاحهم رصاص
يحمينى شعار على ورق
ويحميهم رشاش
وشيطان اهوال
قتلتنى رصاصة مصرى
ووارتنى فى حضن نصرى
عايش شاهد على عصرى
مصرى بيقتل مصرى
عرفتوا قد ايه الفساد
صال وجال
فساد رَجع قابيل وهابيل
فرض قانون الغابه
البقاء للأندل
وللكِرام الزوال
وكان عمرى التمن
تمن انى اخلق المُحال
انى احقق الخيال
امحى فلسفة الأندال
وقدام قوة الصبر
مفيش مُحال
دموعك يا أمى
زرعالى جنه
وشقاك يا بويا
انا بيه بتهنا
وإكتمل بيكم مربع الكمال
وكل ما اموت
بُكاكم يحيينى
اصراركم بيحيينى
وألاقينى
صحيت تانى جاهز للقتال
اصرخ انا لسه حى
حاضن بكره
بأعرفه بولاد الحى
يحضنهم
يخلق منهم ابطال
انا ح أفضل باقى
مدام الحق فى ايد زملائى
ومصر طريقها واحد
واقفه شديده
لا تراجع ولا استسلام
طول ما مصر
ولادها وستتها وعيلها
رجال
طريقهم واحد
واضح
مالوش احتمال
طريق العزة والجلال

أنا والفطير المشلتت
....................
لأنى قاهرى أباً عن جد أى مع سبق الاصرار والترصد فلم أعرف لى يوماً أى ريف أنتمى إليه ، ولم أكون أبداً من أصحاب الطين وكنت دوماً من أصحاب الزفت ( أقصد أسفلت الشوارع طبعاً ) ولحبى الشديد للريف لبديع منظره وطيبة أهله مع مذاق أكله الطيب ، كثيراً ما كنت أتوق لأى دعوة بالزيارة .. وزمان كانت الدعوات كثيرة ، مرة لفرح وثانية لعزاء ومرات للولائم لمجرد تقوية الروابط وكانت كلها فُرص لإمتاع النفس بفطرة الأرض التى فطرها الله عليها ، ومع مرور الوقت واختلاف الطباع بإختلاف الحالة الاقتصادية بدأت تنقرض دعوات الولائم " منه لله المحمول الذى قرب البعيد " فرضيت بالأفراح والمآتم من باب أنها تقضى بالغرض ، وأيضاً لا مانع من المشاركة وهم أصحاب تمثيل مُشَرِف وتاريخ " دسِم " مشحون بذكريات لها مذاق خاص مازال يسيل لعابى .. مرة أخرى بدأت تنحسر دعوات الأفراح وتم إستبدالها بفطيرة مشلتتة وقطعة مِش كنوع من المشاركة وأحنا مش ناسيينك برضه ، وإذا بالفطيرة تندثر إندثار الديناصور الذى لم يكن يمثل لى أى شئ بل العكس أخد الشر وراح أما الفطيرة فأخذت قلبى معها .. ما علينا .. لم يبقى لى من الريف إلا السير خلف الجنازات ومع كل عزيز أشيعه أشيع معه رابطة من روابطى بالريف ، وبعد فترة طالت حتى ظننت أننى تم استبعادى من كشوف المعزين بالقُرى وأعود واحمد الله على أنه يمد فى أعمارهم ، وأخيراً أُخبِرت بوفاة والدة زميل بإحدى قرى القليوبية وعلى الفور توجهت إلى هناك ، وبطول الطريق لدى إحساس بإنى توهت فلم تعد الأرض الخضراء بالكثرة السابقة انما بقايا أعمدة خرسانية وأراضى أخرى طالتها يد الأهمال للأسف ، حتى وصلت إلى القرية المنشودة وإذا بى أتأكد من أننى توهت أوبمعنى أصح مصركلها تاهت ، فإذ بهول المفاجأة طيلة مشوار الجنازة .. الطرق ضيقة جداً حتى تظن أنها لن تسع شخص بدين ورغم ذلك مكدسة بالمبانى ذات الأعمدة الخرسانية والتى يبدو عليها مظاهر البذخ والتباهى من حيث الأرتفاع وعلو البوابات وكم الأعمدة وكأنهم يحتمون من قنبلة ذرية ، ناهيك عن محلات الموبيليا الفاخرة وتجار الأسمنت وحديد التسليح .. أى والله بدلاً من تجار البذور والأسمدة .. ألم يعد هناك بندر ؟! .. فلم أجد القرية إلا فى الشوارع الضيقة الممهدة بروث البهائم وأيضاً الذباب الغتيت والأطفال الحفاة نصف العُراة ولا أدرى ما الحكمة من لبسهم النصف العلوى فقط .. هل لايبيعون عندهم ملابس من قطعتين ؟ أم انها عادة فرعونية ؟ .. ولا أدرى لماذا رغم كل مظاهر الثراء البادية على مبانى القرية مازالت حياتهم فقيرة ملوثة ومدارسهم تنم على الجهل والفقر وكأن نعمة المال فقط للمبانى وملء المعدة والتباهى بالدش والمحمول وربما السيارة ألم تكن نظافة القرية من الأولويات ؟ ألم يكن الرقى والتحضر الحقيقى أولى من الفشخرة الزائفة ؟ ، فحمدت الله على انحسار الدعوات عنى وادركت لماذا انتهت الولائم وانقرض المشلتت عندما رأيت الفرن البلدى والعيش المدعم .. بصراحة قلبى انقبض ورأيت أحفادى وهم يستوردون الفجل والجرجير .. واستغفرت الله على أنى انشغلت عن الجنازة " منهم لله " وجدتنى اصرخ جوايا " على فين رايحه يامصر ؟

أيه اللى حصلنا ؟

أيه اللى حصلنا ؟
ليه كرهنا بعضنا ؟
بعد ما كنا عيله
لمانا ليله
حضنانا أرضنا
وكانت مصر أوضه
سيعانا وسايعين بعضنا
ليه دلوقتى اتخنقنا
ومش طايقين نفسنا
نسينا الوطن
واتقسم البدن
انقلبنا على اهلنا
فرقت بنا الديانا
والعَالِم دارى الأمانه
وبقى كل واحد فينا ربنا
لو ربنا كان عاوزها مسيحيه
كان ليه خَلفها بأُمه مسلمه
ولو الدنيا بس للأسلام
كان قادر يهدى للأسلام
كل اللى قبلنا
أزاى ربنا بيرزق الكافر
واحنا بنحاسب بعضنا
أكيد فى اختلفنا حكمه
عرفوها كل اللى قبلنا
اللى ايام جهلهم
كانت أبلغ من عِلمنا
الله يرحم أيام جهلنا
يا مصرى اصحى
الطوفان طايلنا كلنا
ونوح ما سبليناش سفينه
وسفينتنا هى عقلنا
سفينتنا ايمانا بربنا
اللى خلقنا شعوب وقبائل
وعاوزنا كده
لا كلنا نفس اللون
ولا نتكلم نفس اللغه
لكن بنفهم بعضنا
نفس الهوا بيحيينا
نفس الأرض
بتنبت بأكلنا
عشان كلنا ولاد ربنا
حسابنا يعلمه هو
والدنيا لينا كلنا
ليه مش شايفين قُدمنا
وبصين تحت اقدامنا
لو الشراره قادت نار
قبل دارهم ح تاكل دارنا
لو الخراب عَم
والبوم حط على اكتافنا
ح ينوح على كل ولادنا
اصحى يا مصرى
شوف مين اعداءنا
اللى بيحرق شجرنا
مش اللى جدره لافف بجدورنا
مش اللى جده من جدودنا
اصحى يا مصرى
عدوك بره مش جوه
اصحى
علشان خاطر مصر
اللى هى مش مصرهم
ولا هى مصرنا
اللى على ارضها
اختلط دمنا
لما انكسرنا
انكسرنا كلنا
ولما أتى النصر
جَمْعنا ولمنا
مصر اللى هى
عزوتنا وشملنا
مصر الوطن
ولا الوطن ضاع من قلبنا
اصحى
كفايه غفله
الدمار فى منامنا
ح تروح منا السَكره
ويروح منا بكره
ولا ح تنجدنا فكره
اصحى يا مصرى
دول هما احنا
واحنا هُما
ولو الأرض مش سيعانا
بكره النار تسعنا
يالى سايبين النار تلسعنا
اصحى يا مصرى
وشوف أيه جرلنا
ويبقى ليه اتخنقنا ؟
ليه بقينا قتله ؟
وكرهنا نفسنا
ليه بقينا كده ؟
ليه فى زمن النور
بنندم على أيام جهلنا
يبقى أيه اللى حصلنا ؟
أيه اللى حصلنا ؟

مروه الشربينى شهيدة العفة والحجاب

مروه الشربينى
بنت وطنى ودينى
كَتَبِت بدمها
حكاية هوانى وتهوينى
فضحت دموع الذل
فى عيونى
كشفت نظرات الضعف
فى خنوعى
دمها بيسأل
تارى فى رقبتهم
ولا فى رقبة اللى ح ينسونى

مروه
يا شهيدة العفه والحجاب
اصرخى
مين فينا عنده ارهاب
اللى بيدافع عن أرضه
ولا اللى بيقتل بلا اسباب
لو جرحنا صباع ليهم
ينفتح لنا ألف حساب
ولما يقتلونا
نكتم بُكانا بكف العذاب
ونصرخ
بعد ما نقفل علينا الباب
محظور ينسمع صواتنا
محظور نتهم اسيادنا
محظور نهش من طريقنا الكلاب
أو نكون شُجعان
فقط نؤمن أن لكل أجل كتاب

مروه
خرس جوانا الكلام
بلعنا اللسان
واللى قتلك مجنون
وحجابك عدو السلام
وحنا ولا نستحق الأسلام
ولا نستحق يكون لنا مبدأ
طول ما حنا بندَور مين يبدأ
طول ما بنخبى صوابع الاتهام

مروه
لو كنتى المانيه
والقاتل مُسلم
مين منا كان ح يسلم
ديتك ح تكون كام وطن
وكام إساءة
وكام تحقيق
وكام مليون قاضى يحكم
على كل من كان مسلم
حتماً هو مُجرم

مروه
يا شهيدة العفه
يا ضحية الخسه
عزانا تكونى رسالة أمه
لا حول لها ولا قوه
رساله رقيقه بمنتهى القسوه
رساله عميقه مختصره
تنصف القلوب المنكسره
اتوضى بِدَمِك الطاهر
واتكفنى بسرتِك العطره
عليكى ألف رحمه
وعلينا ألف حسره

مروه
للأسف
معندناش غير الأسف
ولطم الخدود
وشق الجيوب
ولبس الاسود
ع العمر اللى اتقصف

يا شهيدة العفه والحجاب
ادعلنا
ان الهوان ما ياكُلنا
ان الخوف ما يقتلنا
ادعلنا
دعوة تقعد لولادنا
ومتأخذيناش
احنا قبلك متنا
احنا قبلك متنا
................
عبد المنعم حسين
5 / 7 / 2009

مع السلامه يا عم بش

مع السلامه يا عم بوش
إلهى تكون من اللى
بيروحوا ولا يوجوش
ومعاك ميت ألف قُله
ونيشان على صدرك
شئ إن شا الله يعزك
على كل كتف فرده
وادى اللى يا عم نابك
اسم الله على مقامك
شتيمه مصحوبه بجزمه
يجعلها من حدك ونصيبك
والمره الجايه تصيبك
وتكون مبعوته بتفه
ومع تحيات كل العرب
اللى بيكرهوك كره الجَرب
ويتمنوك العبيط فى الزفه
وفى النهايه والختام
نهديك جايزة باتا للسلام
مختومه بنعل الجزمه
ومع ألف ندامه أنت
وألف سلامه للجزمه